ଗାଜା ପ୍ରସଙ୍ଗରେ ଇସ୍ରାଏଲ୍‌କୁ ଆମେରିକାର ବାର୍ତ୍ତା, ପାଲେଷ୍ଟାଇନୀଙ୍କୁ ବଳପୂର୍ବକ ହଟାଇବା ଯୋଜନା ନାହିଁ

ୱାଶିଂଟନ୍/ଜେରୁସାଲେମ୍, (ଖବର ଆମର ) ( ବ୍ୟୁରୋ ରିପୋର୍ଟ ): ଗାଜା ପ୍ରସଙ୍ଗକୁ ନେଇ ଆମେରିକା ଓ ଇସ୍ରାଏଲ୍ ମଧ୍ୟରେ ନୂଆ ରାଜନୈତିକ ଚର୍ଚ୍ଚା ଆରମ୍ଭ ହୋଇଛି। ଆମେରିକାର ଇସ୍ରାଏଲ୍ ରାଷ୍ଟ୍ରଦୂତ ମାଇକ୍ ହକାବି କହିଛନ୍ତି ଯେ, ଗାଜାରୁ ପାଲେଷ୍ଟାଇନୀଙ୍କୁ ବଳପୂର୍ବକ ବାହାର କରିବା ପାଇଁ ଆମେରିକା ସମର୍ଥିତ କୌଣସି ଯୋଜନା ନାହିଁ। ଇସ୍ରାଏଲ୍‌ର କିଛି ମନ୍ତ୍ରୀ ଗାଜାରୁ ପାଲେଷ୍ଟାଇନୀଙ୍କୁ ସ୍ଥାନାନ୍ତରଣ କରିବା ନେଇ ପ୍ରସ୍ତାବ ଦେବା ପରେ ହକାବିଙ୍କ ଏହି ମନ୍ତବ୍ୟ ଆସିଛି। ଏହାସହିତ ଆମେରିକା ରାଷ୍ଟ୍ରଦୂତ ପଶ୍ଚିମତଟରେ ପାଲେଷ୍ଟାଇନୀଙ୍କ ବିରୋଧରେ ହେଉଥିବା ଇସ୍ରାଏଲୀ ବସ୍ତିବାସୀଙ୍କ ହିଂସାକୁ ମଧ୍ୟ ନିନ୍ଦା କରିଛନ୍ତି। ସେ ଏହି ହିଂସାକୁ ଇସ୍ରାଏଲ୍‌ର ଆନ୍ତର୍ଜାତୀୟ ଛବି ପାଇଁ କ୍ଷତିକାରକ ବୋଲି କହିଛନ୍ତି। ଅନ୍ୟପଟେ, ଦକ୍ଷିଣ ଲେବାନନ୍‌ରେ ଇସ୍ରାଏଲ୍ ଓ ହିଜବୁଲ୍ଲାହ ମଧ୍ୟରେ ଉତ୍ତେଜନା ଜାରି ରହିଛି ଏବଂ ଏହାକୁ ନେଇ ଆମେରିକା ମଧ୍ୟସ୍ଥତାରେ ଆଲୋଚନା ଚାଲିଛି।